mp cg news live मध्यप्रदेश छत्तीसगढ़ न्यूज़ लाईव

ऐ बहिनी ऐ साल ले मोर हॉंथ म राखी मत बॉंध बे – दशवंत सिंह धुर्वे की लेख

रक्षाबंधन पर्व पर दशवंत सिंह धुर्वे, रायपुर, छत्तीसगढ की आलेख।

ऐ बहिनी, ऐ साल ले मोर हॉंथ म
राखी मत बॉंध बे !
धान ल बेंच के राखी ले बे त
काला खाबे रॉंध के!!
ये मनु वादी मन के तिहार आए
वोहि मन ल भाए!
हमन नई परन ऐकर चक्कर म
जनजाति समुदाय!!
बाम्हन मन मन्त्र पढय
हमर हॉंथ म धागा ह बंधागे !
पॉंच रूपया के मौली धागा बर
पॉंच हजार लूटागे!!
समझावत हंवव तोला दीदी
बात ल गठरी बॉंध ले!
ऐ बहिनी, ऐ साल ले मोर हॉंथ म
राखी मत बॉंध बे!!
सत्य नारायण के पूजा म
गउ धन के दान देवागे!
रूपिया सोना चॉंदी कोदो
कोठि के धान ह सिरागे!!
नवरात म नव दिन उपास रहि के
सेव केरा चढाथन!
घर के दाई ददा पानी मॉंगथे
त हबरस ले चिल्लाथन!!
पारा परोस ल सबो ल बता देबे
दिन बेरा अउ सॉंझ ले!
ऐ बहिनी, ऐ साल ले मोर हॉंथ म
राखी मत बॉंधबे !!
सावन म पथरा म दूध ल
रिकोवत मनौती मंगाथन!
नवमी बर नव कन्या खवाके
बडे भंडारा कराथन!!
दाई ददा मन भुखे रहि जाथे
वृद्धाआश्रम भेजवाथन!
पहुंचय जन जन ऐ शोर संदेशा
बने मया बगराथन!!
रहय सुख शॉति समृद्ध तोर
घर उजियारी नॉंव के!
ऐ बहिनी, ऐ साल ले मोर हॉंथ म
राखी मत बॉंध बे!
धान ल बेंच के राखी ले बे त

काला खाबे रॉंध के!!


दशवंत सिंह धुर्वे,रायपुर छत्तीसगढ

Leave a Reply

Your email address will not be published.

Back to top button

Adblock Detected

Please consider supporting us by disabling your ad blocker